110 cernemints

     Une aventure vécue et contée non sans malice par Gérard Couche

     



           I faut que j’te conte l’dernière quinte qu’j’ai eu à Roost. Euj’rinte d’mins tchiot villache d’Italie eul 27 du mos d’ahoûte. Eul 28, j’vas vir au courrier. Y avot eune grinte invloppe avec eune Marianne au d’zeur. « Oh la la ! » que j’me dis « Cha sint mauvais ». Dins l’timps, in avot quer Marianne, ch’étot la République, eune belle femme aveuc eun biau visache sous sin bonnet phrygien, eun décolleté à béfiller, d’l’énergie dins l’regard, mais amiteusse tout d’min’me. In l’véyot aveuc contintemint dins tous les mairies et les maisons du peuple, bref « Liberté, Egalité, Fraternité ! » J’y croyaus ocor à l’époque-là. Acht’heur, quint’ té vos eune Marianne, ch’est su eune inveloppe, et surtout quind elle est grisse, ch’est mauvais sin’ne : l’z’impôts, les taxes ed’chi et d’là, les règlemints, o bein eune pron’ne. Ben là, ch’étot eune pron’ne.

Cré vingt dieux, j’ai pourtint fait attintion sur l’autoroute ! J’ai bein vu eune leumière s’alleumer à l’intrée d’Aix-in-Provence, mais d’pus avint-hier, l’pron’ne n’a pas cor pu arriver à m’baraque. A vir eul vitesse du qui z’arrivtent les masques, les tests et les vaccins, ch’est pas possippe que m’pron’ne arrive si habile !

Euj lis pu avint : « Circulation d’un véhicule non autorisé sur une voie réservée aux véhicules de transport public de voyageurs » Avenue des martyrs de la résistance à Roost-Warendin. J’sus parti d’pus deux mos, mais si y avot eun couloir d’autobus in plein Roost, je l’saros vin’deck. Et pis, el pron’ne date du 12 mai 2020 à 18 h 43 : y-a deux mos et d’mi, in plein confinemint. Y a eun berlusache queque part ! J’in’r’busie. Ah ouais ! J’min rappelle acht’heure ! Au collèche, l’arrêt d’bus des élèves. Ch’est vrai……


Eune idée comme cha, j’vas passer là pour vir commint qu’y passtent les autobus

Y avot pas eun bus aux alintours, pas eun élèfe à cht’heure là et à ch’momint-là surtout, même pas eun seul gin. Alors, j‘fais l’tour comme cha dins aveuc m’auto, eune pleum’, tout duchmint pou faire comme les bus, comme quind euj voulos ête chauffeur quind j’étos gosse, par curiosité, eune tchiote fintaisie quoi, comme eun dit acht’heure, eun acte gratuit. Je n’pinsos pas qu’eun acte gratuit cha pouvot coûter 90 €.

            Ch’est vrai qu’l’agint verbalisateur N°2860 et des berquettes, i n’pouvot pas m’connaite. Y n’pouvot pas savoir que j’n’étos pas eun terrorisse, eun blaque-bloque, eun vindale. J’sus fort connu à Roost, l’garde champête i arot pinsé : « Ah, je l’connos ch-ti lal, y a cor eu eune touquette ! » I m’arot dit : « Fais eun tchiot cop attintion à ti ! » Et cha s’arrêtot là. Mais l’ N° 2860…, derrière s’ordinateur… I n’me connot pas. O bein, ch’est qui m’in veut.

Adins, y avot des policiers d’la route, des agints d’proximité, des agints d’la circulation pou aider les gins. Ch’ti qui n’faijot pas d’travers étot cotint d’les vir. Aujord’hui, y a pus foque qu’des agints verbalisateurs. I n’verbalis’tent rein du reste, vu que té les vos pas. I restent muchés derrière leus caméras, leus écrins et leus N°, té n’peux même pas t’essepliquer.
Ch’est dev’nu des S.A.V. : t’Surquer, t’Aligner, t’Verbaliser.

Les caméras, cha n’est rein d’aute que des machines à pron’nes pour taxer l’honnête citoyen qui fait eune tchiote bêtisse ed’ rin du tout. Ch’est cha l’modernisse et l’nouvelle humanité. Ch’est des sous qui leu faut. Mais cha n’a jamais impêché les malfaisants et les malfrats. Tout juste peut-ête à les rattraper… mais tout jusse, et lormint après !

T’as qu’à d’minder à Estrosi, y-in sait quett quosse. Nice, ch’est l’ville el pus camérisée d’Frince, et i s’a pris 4 attintats terrorisses dins l’nez. I prind toudis les m’sures les pus fortes d’confinemint, d’couvre-feu, et tout et tout, et chez là qu’y a d’puque ed cas d’COVID.

I n’impêche qu’j’ai caché à comprind commint qu’ch étot possible eune affaire parelle. Et j’ai treuvé !

              Un camarate policier m’a dit qu’ch’étot comme à l’école primaire. Quind te travalles bein, t’as eun bon point. Quind t’as 10 bons points, t’as eune imache. Et quind t’as grammint d’imaches, t’as eune grinde imache. Dins la police, ch’est parel. Quind te prinds in flagrint délit, o bein su l’ordi eun Vindale, eun terrorisse, infin, un gin dingereux pour la société, comme mi à l’arrêt d’autobus si t’aimes mieux, t’a gagné un « cernemint ».

Pourquo eun cernemint ? Passe que t’as bein cerné l’problim’me, t’as bein cerné l’criminel, et t’as bein cerné l’solution à printe. Quind t’as gagné 10 cernemints, t’as eune tchiote prime. Et si qu’t’est ocor pus efficace, et qu’t’arrives à guingner in travaillant 110 cernemints, alors, t’as eune barette, et te monte in grade. Voilà, ch’est pas pus compliqué qu’cha. Ch’est pour cha qu’in met des caméras tout partout et qu’les pron’nes i kettent pindint les quat’ saisons. Y a même pus besoin d’s’ingéler in hiver o bein de s’racruire in automne. Té r’meures au quaud d’vint t’n’écrin d’télé, ch’est l’caméra et l’ordinateur qui font tout. Y-a-foque à appuyer su ch’bouton, comme su l’accordéon.

              Mais mi, cha m’fait peur tout cha. Cha m’fout l’moral in bas d’savoir qu’dins min villache te n’peux pus faire eun pas d’travers sins ête télé-surveillé, inregistré, épluché, aligné. J’ai même pu invie d’aller train’ner. Cha m’fait surtout peur pour les tchiots jeunes qui n’ont jamais connu aut’quosse. Qui n’ont jamais été faire ed travers dins ch’bos aceuc les files, qui n’ont jamais été à l’rapein’ne, o bein j’té des tchiots caillos dins les ferniettes du vieux grigou d’à côté pour l’faire émarvoyer.

J’sins qu’aussitôt que j’peux, j’vas r’tourner dins min tchiot tro italien. In y respire mieux, l’air elle est pus fine, pus légère. Ch’est normal, y pas d’police, y a pas d’caméra, et y n’d’a pas d’puque qui font d’travers qu’ailleurs.

Y z’ont p’tête conservé ch’t’air là qu’Jein Ferrat quintôt et sintôt « par-delà les frontières » dins s’quinchon « Ma France » et qu’in n’treuffe pus ichi.

Commint qu’ch’étot déjà ? Ah ouais, j’m’in rappelle :
I parlot d’un « air ed liberté ! »